பண் ஆகும் காமம் பயிலும் வசனமும்
விண் ஆம் பிராணன் விளங்கிய சத்தமும்
புண் ஆம் உடலில் பொருந்து மனத்தையும்
அண்ணாந்து பார்க்க அழியும் உடம்பே.

அழிகின்ற ஓர் உடம்பு ஆகும் செவி கண்
கழிகின்ற கால் அவ் விரதங்கள் தானம்
மொழிகின்ற வாக்கு முடிகின்ற நாடி
ஒழிகின்ற ஊனுக்கு உறு துணை இல்லையே.

இலை ஆம் இடையில் எழுகின்ற காம
முலை வாய நெஞ்சத்து மூழ்கும் உளத்துத்
தலை ஆய மின் உடல் தாங்கித் திரியும்
சிலை ஆய சித்தம் சிவ முன் இடைக்கே.